На Клиниката за инфективни болести во моментов се хоспитализирани вкупно седум пациенти заболени од западнонилска треска, од кои двајца се во тешка состојба. Според оценките на директорот на Клиниката, Фадил Цана, ситуацијата со вирусот почнува да стивнува.
Во текот на последнава недела, да не кажам и десет дена, само еден суспектен хоспитализиран пациент, додека другите се истите шест потврдени пациенти, од кои два се потешко болни и сè уште се на респираторна поддршка и се наоѓаат во Одделот за интензивна нега. Останатите се стабилни и се на Одделот за невроинфекции, изјави Цана.
Двата најтешки случаи се сè уште без подобрување. Заболените се исклучиво повозрасни лица, при што последниот примен пациент има 70 години.
Здравствените власти очекуваат целосно смирување на епидемијата со пад на температурите.
Очекуваме како што опаѓаат температуриве, да заврши и оваа епидемија, заради тоа што по сите светски статистики така се одвива епидемијата, во доцните летни месеци, т.е. септември, се очекува пад. Но, мора да го кажеме и тоа дека по преземените мерки од здравствените власти и локалните власти, особено во општините што беа зафатени со епидемија, се гледаат резултати и имаме намален број на инфицирани, рече Цана.