Благодарение на брзата реакција на припадниците на Територијалната противпожарна единица и доброволните пожарникари од Доброволното противпожарно друштво – Штип, спречено е ширењето на пожарот кој беснееше, кон првите куќи во штипската населба Кадидаре.
Пожарот избувнал вчера попладне, откако удар од гром запалил сува трева и грмушки. Поради силниот ветер, огнот брзо се проширил кон ридовите Клисебаир и Кумлак.
Градоначалникот на Општина Штип, Иван Јорданов, на вонредна прес-конференција изјави дека пожарот зафатил непристапен терен, а огнените јазици биле видливи од повисоките делови на градот, приближувајќи се кон населбата Кадидаре.
„Поради силниот ветер и непристапниот терен, пожарот зафати ридови кои се во непосредна близина на неколку штипски населби. Екипите на ТППЕ и членовите на Доброволното противпожарно друштво веднаш излегоа на терен, заедно со целокупната логистика, ресурси и механизација на јавните претпријатија, со цел да го локализираат пожарот“, изјави Јорданов.
Доброволниот пожарникар од ДПД – Штип, Зоран Младеновски, посочи дека пожарот е ставен под контрола.
Во интервенцијата учествувале 12 доброволни пожарникари со сопствени теренски возила.