СДСМ обвинува дека премиерот Христијан Мицкоски се обидува да создаде алиби за распишување предвремени парламентарни избори, а наводните несогласувања со коалицискиот партнер ВЛЕН по изборниот резултат во Брвеница ги оценува како обид за дефокусирање на јавноста од, како што велат, посериозните проблеми со Алта банка.
Од СДСМ тврдат дека зад политичките случувања стои обид за избегнување одговорност за прашања поврзани со криминалот, корупцијата и случајот со Алта банка. Партијата оценува дека финансиската состојба и состојбите во институциите отвораат сериозни прашања за работењето на Владата.
Во соопштението СДСМ упатува обвинувања и за наводна поврзаност на ВМРО-ДПМНЕ со Српската напредна странка и криминални структури, тврдења за кои не приложува докази во реакцијата.
Од опозициската партија сметаат дека Мицкоски во наредниот период ќе се обиде политичката агенда да ја насочи кон националистички и популистички теми, со цел да се пренасочи вниманието од економските и финансиските прашања.
СДСМ во реакцијата ги споменува и Левица и ЗНАМ, оценувајќи дека овие политички субјекти би можеле да имаат улога во идните политички комбинации.
Од партијата порачуваат дека граѓаните ги гледаат состојбите во државата и дека изборните резултати во Брвеница не можат да ги прикријат прашањата за јавните финансии и случајот со Алта банка.