Без возачка дозвола било 18-годишното момче кое вчера кај ТЦ Берверли Хилс ја прегази и исмрти 67-годишната Љуба Јаковлева, потврди Обвинителството. Тинејџерот преминал на спротивна лента и удрил во жената, по што избегал без да застане.
„По улицата “Народен Фронт” управувал автомобил “Фолскваген пасат’’ и со возилото извршил дејствие на непрописно поместување во лево, на коловозната лента наменета за сообраќај од спротивната лента, без притоа да се увери дека тоа може да го стори без опасност по другите учесници во сообраќајот, со брзина на движење на возилото неприспособена спрема својства, состојбата на патот, видливоста, густината на сообраќајот и другите сообраќајни услови. Освен тоа, автомобилот го управувал без да поседува важечка возачка дозвола, велат од ОЈО.
При такви услови со возилото удрил во 67-годишната Љуба која во тој момент го поминувала коловозот.
„Од ударот и падот на коловозот жената се здобила со тешки телесни повреди, а осомничениот без да и укаже помош веднаш го напуштил местото на настанот. Жртвата била префрлена во Ургентниот центар каде и покрај укажаната медицинска помош починала.“
МВР веќе соопшти дека тој и неговиот татко ја напуштиле Македонија. Помош имале од друга двајца осомничени, маж и жена, кои веќе се приведени.
„Другите двајца осомничени, маж и жена, му помогнале на осомничениот за предизвикување на сообраќајната несреќа да ја напушти државата, пренесувајќи го со својот автомобил преку граничниот премин Табановце. Тие се лишени од слобода по враќањето во земјава и за нив јавниот обвинител до судијата на претходна постапка од Основниот кривичен суд Скопје достави предлог за определување мерка притвор.“, велат од ОЈО.
ОЈО бара притвор за возачот во бегство, и за него него притворот ќе стартува откако ќе биде пронајден и лишен од слободан.
„Во меѓувреме, врз основа на прибраните докази и определениот притвор, по него ќе биде распишана и меѓународна потерница со цел негово обезбедување.
Основното јавно обвинителство Скопје донесе Наредба за спроведување истражна постапка против 18-годишно лице за тешки дела против безбедноста на луѓето и имотот во сообраќајот и за неукажување помош на повреден. Истовремено, под истрага се и две лица кои му помогнале да избега.“, велат оттаму.