Седум лица мигранти напикани во патничко возило „фиат стило“ со туѓи таблички и возач без возачка дозвола е дивиот шверчерски потфат што го пресекоа граничните полицајци кај Гевгелија.
Инцидентот се случил на крстосницата меѓу локалниот пат од селото Богородица и регионалниот пат кон Богданци, кога полициска патрола го сопрела возилото со австриски ознаки за редовна контрола.
При прегледот на автомобилот, полицајците затекнале четири лица од Пакистан, две од Авганистан и едно лице од Турција, кои биле превезувани илегално.
Дополнителната проверка открила дека 36-годишниот возач Д.К. од Струмица управувал без возачка дозвола, а регистарските таблички воопшто не му припаѓале на возилото, со што направил серија тешки кривични дела.
За случајот веднаш е известен јавен обвинител, а мигрантите се пренесени во Прифатно-транзитниот центар „Винојуг“ во Гевгелија.
Против струмичанецот ќе биде поднесена кривична пријава по членовите за криумчарење мигранти, фалсификување исправа и безобѕирно управување со моторно возило.
- „На 24.07.2026 во 19:30 часот во близина на крстосница од локален пат с.Богородица-Гевгелија и регионален пат Гевгелија-Богданци, полициски службеници од Полициската станица за гранични проверки и граничен надзор Богородица го лишија од слобода Д.К.(36) од Струмица поради основи на сомнение за сторени кривични дела по член 418-Б, член 378 и член 297-а од Кривичниот законик. Имено, при контрола во возило „фиат стило“ со австриски национални ознаки, кое го управувал, биле пронајдени седум лица мигранти, од кои четири од пакистан, две од Авганистан и едно од Турција. Додека, по извршени дополнителни проверки било констатирано дека регистарските таблички припаѓале на возилото, а тој го управувал без возачка дозвола. За настанот е известен јавен обвинител,а мигрантите биле спроведени во прифатно-транзитен центар „Винојуг“ во Гевгелија. По целосно документирање на случајот, против Д.К. ќе биде поднесена соодветна пријава“, информираа од МВР.