Досегашниот вицепремиер за добро владеење, Арбен Фетаи, ќе биде именуван за нов специјален претставник на македонската влада во Брисел, соопшти копретседателот на коалицијата ВЛЕН, Изет Меџити.
Актуелниот градоначалник на Општина Чаир појасни дека Фетаи веќе официјално поднел оставка од вицепремиерската функција за добро управување со цел да биде ангажиран на новата дипломатска позиција.
Оваа кадровска одлука доаѓа по периодот во кој Фетаи речиси два месеци не се појавуваше на владините седници и немаше видливи активности како вицепремиер, иако во меѓувреме ја примаше функционерската плата.
Во однос на идните чекори на Илинденска, Меџити потврди дека коалициските партнери веќе имаат начелна согласност за реконструкција на владиниот кабинет.
Сепак, првиот човек на Чаир нагласи дека партиските лидери сè уште немаат седнато на заедничка маса за да ги утврдат конкретните принципи по кои ќе се делат ресорите.