Посетителите на плажите долж западниот брег на Истра се повикуваат на зголемена претпазливост поради наглата појава на голем број медузи, меѓу кои доминира опасната компас-медуза. Овој специфичен вид е познат по тоа што предизвикува исклучително болни реакции и изгореници при контакт со човечката кожа.
Хрватските морски експерти појаснуваат дека навлегувањето на овие суштества е директно поврзано со сезонските циклуси и невообичаено високите температури на морската вода.
Компас-медузата има долги пипала исполнети со жарни клетки кои при допир предизвикуваат силно печење, црвенило, чешање и отоци. Иако симптомите главно исчезнуваат по неколку часа, лекарите предупредуваат дека децата, алергичните лица и луѓето со чувствителна кожа можат да развијат посериозни компликации.
Од Центарот за истражување на морето во Ровињ смируваат дека нема место за паника, но апелираат до капачите, а особено до родителите, да внимаваат децата да не ги допираат медузите дури и кога се исфрлени мртви на плажата.
Напоредно со нив, во северниот Јадран се забележани и масовни групи ребраши (познати како „морски орев“). Тие се безопасни за луѓето, но претставуваат закана за рибниот фонд бидејќи ја јадат храната на автохтоните видови.
Научниците проценуваат дека со завршувањето на нивниот природен животен циклус, бројот на компас-медузите постепено ќе се намали во следните две недели.