Стихозбирката „Ако не се отвори фиоката мачката ќе биде жива“ од Даниела Андоновска-Трајковска е избрана за добитник на наградата „Антево перо“ за 2026 година, соопшти жири-комисијата на манифестацијата „Анте Поповски – Антево перо“.
Одлуката била донесена едногласно, по разгледувањето на деветте ракописи кои се најдоа во потесниот избор, од вкупно 115 пристигнати поетски дела.
Според жири-комисијата, наградената стихозбирка претставува поетско-филозофско истражување на самоспознавањето, при што авторката користи современ поетски израз и дуалистички принципи. Како особено значајна е издвоена метафората на Шредингеровата мачка, преку која се обработуваат темите на постоењето, можноста и конечноста, како и животот и смртта.
Годинава се доделени и три награди „Антев златник“. Добитници се Ерол Туфан за „Недовршени песни“, Емељ Туна за „Анатомија на бршленот“ и Милош Соколиќ за „Име во идно време“.
Наградата „Антев часовник“, наменета за афирмација на млади поетски автори, им припадна на Дарија Јовановска за „Протекување“ и Марија Велинова за „Штрингла“.
Годинашниот конкурс привлече рекорден број пријави, што според организаторите претставува потврда за интересот за современото македонско поетско творештво.