Почина проф. д-р Никола Петров, еден од најзначајните македонски педагози и научни работници, кој остави длабока трага во развојот на предучилишната педагогија и образованието во Македонија. Веста за неговата смрт е објавена на 15 ноември 2026 година.
Петров важи за основоположник на македонската предучилишна педагогија, а неговиот професионален и научен пат беше исполнет со бројни достигнувања и значаен придонес во образовниот систем.
Специјалистичките студии ги завршил во Русија, а докторската дисертација ја одбранил во Белград. Во текот на својата академска кариера бил раководител на Институтот за педагогија и декан на Педагошкиот факултет во Скопје, давајќи значаен придонес во развојот и афирмацијата на Педагошкиот факултет „Св. Климент Охридски“ при УКИМ.
Неговото име е тесно поврзано и со македонското издаваштво за деца. Како долгогодишен соработник на „Просветно дело“ и главен уредник на педагошкото научно-стручно списание, Петров е основоположник на култното списание за најмладите „Росица“, како и на детските списанија „Другарче“, „Развигор“ и „Наш свет“, со кои растеа и се воспитуваа бројни генерации.
Со својата стручност и посветеност, тој активно придонесуваше за унапредување на педагошката наука, а неговите ставови и стручни анализи често беа присутни и во образовните емисии на Македонската радио-телевизија и другите медиуми.
Проф. д-р Никола Петров уживаше голем углед и надвор од земјата, соработувајќи со истакнати професори и научни работници од регионот и пошироко. Бил визитинг-професор и член на уредувачки одбори на научни списанија.
За својот животен опус и придонес во науката и образованието ги добил највисоките државни и општествени признанија, меѓу кои наградите „11 Октомври“, „13 Ноември“ и „Св. Климент Охридски“.
Со неговото заминување македонската педагошка наука и образованието губат значаен творец, професор и визионер. Ќе остане запаметен како посветен педагог, мудар ментор, ценет соработник и човек кој остави трајно наследство во образованието и детското творештво.

