Инспекцискиот надзор во Центарот за социјална работа во Гевгелија не утврдил пропусти во постапувањето во случајот со 17-годишната Билјана Кириќ од Богданци, соопштија од надлежното министерство. Според наодите на инспекторите, установата постапувала целосно согласно законите и преземала соодветни мерки за нејзина заштита.
Центарот бил известен од страна на МВР на 2 октомври за настан кој се случил на 30 септември. Истиот ден социјалните служби го контактирале таткото на девојката, а на 5 октомври со него и со Билјана биле спроведени официјални разговори и биле земени изјави на записник, при што таткото дал согласност за понатамошни заштитни постапки.
Следниот ден на разговор бил повикан и Виктор Гунтаров, при што социјалните работници му укажале на недозволивоста на насилното однесување и на можните последици.
По извршената проценка на ризикот, Центарот поднел барање до надлежниот суд, кој определил привремени мерки за заштита. Судот изрекол шестмесечна забрана за закани, малтретирање, вознемирување и контактирање со девојката, како и забрана за приближување на растојание помало од 100 метри.
Според информациите на надлежните, во Министерството за внатрешни работи досега немало регистрирано пријава за евентуално прекршување на изречените заштитни мерки.
Наодите од овој инспекциски надзор доаѓаат по протестот против фемицидот и насилството врз жените, каде жителка на Богданци изнесе обвинувања за поширока одговорност на наставниците кои наводно знаеле за насилството и отсуствата на Билјана од училиште. Овие тврдења не се потврдени во официјалниот извештај.
Од министерството напоменуваат дека заклучокот на инспекторите се однесува исклучиво на постапувањето на Центарот за социјална работа во Гевгелија, а не на сите останати институции вклучени во случајот.