Потрагата по 13-годишната Лиза од Берлин заврши со трагично откритие, откако нејзиното тело било пронајдено во стара куќа на напуштена фарма во Алтглицен, во германската покраина Бранденбург. Во истиот објект полицијата пронашла и тешко повреден маж, кој според првичните сомнежи е поврзан со нејзината смрт.
Според неофицијалните информации, мажот се обидел да изврши самоубиство со огнено оружје, по што бил префрлен на болничко лекување.
Имотот каде што е извршено грозоморното откритие се наоѓа во регионот Маркиш-Одерланд, на над 50 километри од семејниот дом на девојчето во берлинскиот округ Марзан. Сопственик на имотот забележал отворена врата во неделата попладне и ја известил полицијата. Локалните жители сведочеле дека пред фармата денови претходно бил забележан паркиран златен автомобил со берлински таблички, а некои слушнале и повици за помош, но никој навремено не повикал надлежни служби.
Лиза исчезнала на 3 ноември откако го напуштила семејниот стан околу 7:17 часот наутро за да замине на училиште. Нејзините последни чекори биле снимени од безбедносна камера во станот, а три минути подоцна комуникацијата со неа била прекината.
Нејзината 17-годишна сестра Линда изјави:
„Таа воопшто не одговори“
Во повеќенедневната интензивна потрага учествуваа стотици полицајци. Полициските истражители продолжуваат со детално утврдување на сите околности за тоа што се случувало со Лиза по нејзиното заминување од дома.