Тројца лица се повредени во сообраќајна несреќа што се случила вчера на локалниот пат меѓу тетовските села Добарце и Чифлик.
Според соопштението од Министерството за внатрешни работи, несреќата била пријавена во СВР Тетово на 4 ноември во 16:05 часот. Во сударот учествувале патничко возило „опел корса“ со тетовски регистарски ознаки, управувано од 55-годишниот А.Ч. од село Чифлик, и четирицикл со тетовски ознаки, што го управувал 34-годишниот Б.С. од село Ларце.
Во сообраќајката, возачот на четирициклот се здобил со тешки телесни повреди, додека возачот на автомобилот и неговиот 16-годишен сопатник поминале со телесни повреди. Сите повредени биле пренесени во Клиничката болница во Тетово, каде им била укажана медицинска помош и биле констатирани повредите.
Увид на местото на настанот извршила екипа од СВР Тетово за утврдување на причините за несреќата.