Европската комисија ќе продолжи да ја поддржува Северна Македонија во спроведувањето на реформите и напредокот кон членство во Европската Унија, но отворањето на првиот преговарачки кластер останува условено со исполнувањето на обврските поврзани со уставните измени.
Ова го порача еврокомесарката за проширување Марта Кос при претставувањето на Пакетот за проширување за 2026 година во Брисел, нагласувајќи дека земјата покажува посветеност на реформската агенда.
Кос потсети дека условот за Северна Македонија е јасно утврден во заклучоците на Советот на ЕУ од 18 јули 2022 година.
„Северна Македонија треба да ја исполни својата обврска за завршување на уставните измени. Сега зависи од Северна Македонија“, порача Кос.
Еврокомесарката истакна дека секоја земја кандидат има можност да се приклучи кон групата држави што побрзо напредуваат кон Унијата, додавајќи дека Европската комисија предлага нов модел на постепена интеграција, со кој земјите кандидатки ќе добијат поголеми придобивки од европските политики и пред формалното членство.
Како новина, Кос најави дека во првиот квартал од следната година ќе започнат дијалози со земјите кандидати за постепена интеграција. Целта е да се разгледаат постојните можности и да се утврдат дополнителни области во кои кандидатите можат поблиску да се поврзат со Европската Унија.
Во своето обраќање таа посебно ја нагласи и безбедносната димензија на проширувањето, посочувајќи дека дезинформациите, кибернападите и организираниот криминал претставуваат заеднички предизвици за земјите членки и кандидатите.
Според Кос, интегрирањето на кандидатите во безбедносните структури на ЕУ ќе овозможи подобра размена на информации, поголема координација и поефикасна борба против миграцијата и организираниот криминал.
Пакетот за проширување за 2026 година опфаќа извештаи за напредокот на десет земји кандидати. По презентацијата, документите ќе бидат разгледани и во Комитетот за надворешни работи на Европскиот парламент, по што ќе следуваат посебни резолуции со ставови и препораки за европскиот пат на секоја од земјите.