Европската комисија констатира „добар напредок“ во дигиталната трансформација и медиумите во Северна Македонија, а во Извештајот за напредокот за 2026 година го зголемува и нивото на подготвеност на државата во оваа област.
Министерот за дигитална трансформација, Стефан Андоновски, информира дека оценката во Поглавјето 10 претставува подобрување во однос на претходните години. Како што посочува, во периодот од 2021 до 2024 година земјата бележела ограничен напредок, во 2025 година одреден напредок, додека во најновиот извештај е констатиран добар напредок.
Андоновски наведува дека меѓу областите во кои се забележани подобрувања се зголемувањето на бројот на електронски услуги и двојно поголемото нивно користење од страна на граѓаните, подобрената електронска размена на податоци меѓу институциите и зајакнувањето на кибербезбедноста.
Како дел од постигнатите резултати ги посочува и донесувањето нови закони и стратегии усогласени со европските стандарди.
Според министерот, целта на дигиталната трансформација е придобивките да ги почувствуваат граѓаните и компаниите во секојдневното функционирање, преку помалку чекање, помалку документација и побрзо добивање услуги.
Андоновски оценува дека позитивната оценка од Европската комисија е признание за досегашните активности, но и обврска за продолжување на реформите во процесот на дигитализација на државата.