Врз основа на наредба од Специјалното одделение за сузбивање на корупцијата при Вишото јавно обвинителство во Нови Сад, денеска се уапсени Предраг Вулетиќ, покраински секретар за социјална политика, демографија и родова рамноправност, и Д. М., претседател на соодветната комисија за распределба на средства. Двајцата се товарат за продолжено кривично дело злоупотреба на службената положба.
Според информациите од предистражната постапка, постојат основи на сомнение дека Вулетиќ и Д. М., преку конкурсите за доделување грантови за решавање на станбени прашања на семејства со трето или четврто дете во АП Војводина за периодот од 2021 до 2024 година, стекнале противправна имотна корист за други физички лица во износ од 130.900.000 динари.
Истрагата утврдила дека лицата на кои им биле доделени средствата воопшто не го исполнувале основниот услов предвиден во конкурсот, односно раѓање на трето или четврто дете. Со овие дејствија, осомничените му нанеле директна штета на буџетот на АП Војводина во износ од 130,9 милиони динари.
На Вулетиќ и Д. М. им е одредена мерка задржување до 48 часа, во кој рок ќе бидат спроведени на сослушување во Специјалното одделение за сузбивање на корупцијата.
Инаку, Предраг Вулетиќ е член на Претседателството на Покретот на социјалистите и важи за еден од најблиските соработници на Александар Вулин. Благодарение на оваа политичка поврзаност, тој низ годините извршувал повеќе раководни функции, меѓу кои и член на Управниот одбор на Агенцијата за безбедност на сообраќајот и позицијата покраински секретар.