Вишиот суд во Белград му одреди 30-дневен притвор на директорот на Републичкиот хидрометеоролошки завод (РХМЗ), Југослав Н. (71), осомничен за перење пари и прикривање имот во вредност од најмалку 650.000 евра, во соработка со Олга Н. (71) и Ѓорѓе Н. (45).
Притворот за Југослав Н. е одреден за да не влијае врз сведоците и да не го повтори кривичното дело, потврди за Танјуг портпаролката на Вишиот суд, Ивона Чогуриќ.
За Олга Н. е одредена мерка куќен притвор со електронски надзор и забрана за комуникација со сведок, додека за Ѓорѓе Н. притворот е укинат и тој ќе се брани од слобода. Сите осомничени се товарат за пренос и конверзија на имот стекнат со криминална дејност во периодот од ноември 2019 до ноември 2024 година, а на сослушувањето во Вишото јавно обвинителство се бранеле со молчење.
Покрај перењето пари, директорот на РХМЗ се товари и за непријавување имот и давање лажни податоци согласно Законот за спречување на корупцијата. Според обвинителството, тој во наведениот период извршил готовински уплати без потекло во износ од над 41,8 милиони динари, 43.150 евра и 44.760 швајцарски франци, со кои купувал недвижности во Белград, Ужице и Црна Гора, за што не ја известил Агенцијата за спречување на корупцијата.