Како младите ги избираат изворите на информации, колку им веруваат на содржините што ги гледаат на интернет и дали можат да ги разликуваат вистинските вести од манипулациите – овие прашања денеска ќе бидат тема на дебата во Собранието, на која ќе учествуваат средношколци и пратеници.
Настанот е организиран под мотото „Што гледаш, кому веруваш? – Младите, информациите и дезинформациските кампањи“, во организација на Институтот за комуникациски студии (ИКС), во партнерство со Парламентарниот институт и Клубот за младински прашања и политики при Собранието.
Целта е преку непосредна размена на мислења да се утврди со какви информациски предизвици се соочуваат младите, особено во време кога социјалните мрежи и дигиталните платформи имаат сè поголемо влијание врз формирањето на нивните ставови.
Посебно внимание ќе биде посветено на влијанието на инфлуенсерите и креаторите на дигитални содржини, но и на опасностите од лажни вести, пропагандни пораки и материјали создадени со помош на вештачка интелигенција.
На дневен ред ќе се најде и образовниот систем, односно прашањето дали наставните програми ги подготвуваат учениците за критичко оценување на информациите и справување со современите облици на дезинформирање. Учесниците ќе разменат идеи за можни промени во образованието и унапредување на медиумската писменост.
Дискусијата ќе се потпира на резултати од истражувања спроведени во земјава и регионот, кои ги анализираат медиумските навики и нивото на медиумска писменост кај младите, како и на примери од образовната практика.
Настанот ќе го отворат претседателот на Собранието, Африм Гаши, и британската амбасадорка Маја Сивањанам.
Во разговорот ќе се вклучат ученици од седум средни училишта од Скопје, Прилеп, Валандово, Велес и Липково, како и пратеници и претставници на надлежните институции и организации.