Европските берзански индекси денеска бележат претежно пад, додека цените на нафтата од типот Брент се искачија над 115 долари за барел. Пазарите во моментов ја чекаат одлуката на Федералните резерви на САД (ФЕД) за каматните стапки.
Експертите генерално очекуваат ФЕД да ги задржи каматните стапки во опсег од 3,75 до 4 проценти, и покрај обновеното забрзување на инфлацијата и зголемувањето на цените на енергијата, објави CNBC.
Утрово во 9:30 часот, цената на нафтата Брент забележа раст од 0,99 проценти и се тргуваше по 115,031 долари за барел, додека американската лесна сурова нафта WTI поскапе за 1,63 проценти, достигнувајќи 101,558 долари.
Сложени остануваат состојбите и на пазарот на гас. На отворањето на берзата TTF во Амстердам, европските фјучерси за ноември се тргуваа по 97,495 евра за мегават-час (околу 1.023,70 евра за 1.000 кубни метри). Со ова цената на гасот во Европа го достигна највисокото ниво од декември 2022 година.
Нивото на попунетост на европските складишта за гас на крајот од октомври изнесува 74,6 проценти, што е под вообичаениот просек. Дополнително, компанијата „Катар Енерџи“ го продолжи прекинот на испораките до одредени клиенти до крајот на декември, објави „Ројтерс“.