Претседателот на СДСМ, Венко Филипче, во пресрет на почетокот на амандманската расправа за вториот ребаланс на Буџетот во собраниската Комисија за финансирање и буџет, обвини дека состојбата со државните финансии е сериозно влошена.
„Сè повеќе на виделина излегува дека Буџетот е во катастрофална состојба. Недостигаат речиси милијарда евра, односно 900 милиони евра“, изјави Филипче.
Тој тврди дека дополнителен проблем е состојбата во Фондот за пензиско и инвалидско осигурување, каде, според него, за исплата на пензиите недостига уште околу една милијарда евра.
„Сериозно е загрозена стабилноста на Буџетот и сè повеќе се отвора прашањето од каде и од кои извори во следниот период ќе се исплаќаат и платите и пензиите“, рече лидерот на СДСМ.
Филипче го критикуваше и фактот што пред крајот на годината се носи втор ребаланс, оценувајќи дека во овој период другите држави веќе ги подготвуваат буџетите за 2027 година.
„Нема поголем доказ за лошо менаџирање со Буџетот, финансиите и економијата од овој втор ребаланс“, рече Филипче, додавајќи дека, според него, се остваруваат предупредувањата што СДСМ ги изнесувал уште при јулскиот ребаланс.