Царинските службеници заплениле 135 килограми режан тутун и 30 литри алкохол при контрола на тезги на зелениот пазар во Чаир, каде биле затекнати три лица кои продавале акцизни производи без соодветни акцизни маркички.
Од Царинската управа информираат дека со продажбата на овие производи била избегната уплата на акциза во износ од 337.558 денари.
Контролата ја спровеле службеници од Царинарница Скопје и мобилни тимови од Одделението за оперативни работи, во рамки на засилените активности за спречување на нелегалната трговија со тутун и тутунски производи.
ВИДЕО и ФОТО: Царина
Против две лица ќе бидат поднесени прекршочни пријави, додека за третото лице, кај кое е утврдено избегнување акциза во износ од околу 257.000 денари, ќе следува кривична пријава.
Од Царинската управа посочуваат дека контролите на домашниот пазар продолжуваат паралелно со истрагите поврзани со увозот на тутун и тутунски производи, со цел откривање и спречување на нелегалната трговија и заштита на државниот буџет.