Претседателот на Турската демократска партија (ТДП) и министер во Владата на Република Северна Македонија, задолжен за меѓународна соработка и странски инвестиции, Зулфикар Зејнула, ја оствари својата прва официјална посета во странство по стапувањето на министерската функција, посетувајќи ја Република Турција, каде што оствари средба со министерот за надворешни работи, Хакан Фидан.
На средбата се разговараше за историските пријателски односи и длабоко вкоренетите братски врски меѓу Турција и Северна Македонија, за унапредувањето на политичката и економската соработка, зголемувањето на меѓусебните инвестиции, како и за прашања од особено значење за иднината на турската заедница во Република Северна Македонија. Посебно беше истакнато значењето на одржувањето и понатамошното зајакнување на блиските односи меѓу Турската демократска партија, која има долгогодишна традиција во политичкото претставување на турската заедница во Северна Македонија, и Република Турција, која за турската заедница претставува историска татковина.
Воедно, беше нагласена цврстата определба за заштита на правата на турската заедница, зачувување на нејзиниот национален идентитет и зајакнување на нејзината политичка застапеност. Беше посочено дека оваа посета претставува значаен чекор не само во насока на продлабочување на дипломатските и билатералните односи меѓу двете држави, туку и во понатамошното зацврстување на историските, нераскинливи и братски врски на турската заедница во Северна Македонија со Република Турција.
На крајот од средбата, министерот Зулфикар Зејнула изрази искрена благодарност до министерот за надворешни работи на Република Турција, Хакан Фидан, за укажаното внимание, срдечното гостопримство и драгоцената поддршка.