Употребата на сила од страна на полицијата била оправдана кога полицајците отвориле оган врз автомобил за време на истрага за кражба, при што загина едногодишниот Коен Вајли, заклучи јавниот обвинител на американската сојузна држава Мисисипи. Инцидентот се случи во јуни додека детето седело во скутот на мајка си, а полицијата тврди дека возачот го насочил возилото кон полицајците.
Случајот започнал на 14 јуни, кога полицијата била повикана во продавница на „Волмарт“ (Walmart) во градот Сенатобија поради пријава за кражба на пелени и облека за бебиња. Според Бирото за истраги на Мисисипи, полицајците наишле на две жени и дете на паркингот додека се приближувале кон автомобилот. При обидот да го запрат возилото, тоа се движело кон еден од полицајците, за малку удирајќи го.
Во тој момент еден полицаец отворил оган, при што куршумот го усмртил детето и тешко ја ранил возачката, Латоја Ферел.
Мајката на Коен, Велесија Вајли – која седела на предното совозачко седиште со детето во скут – негира дека таа или Ферел украле нешто. Таа изјави дека го кренала синот за полицајците да можат да го видат, само неколку моменти пред тој да биде погоден. Против ниту една од жените досега не се поднесени кривични пријави.
Јавниот обвинител Лин Фич ги објави наодите од истрагата преку кратка официјална изјава.
„Во овој инцидент, Канцеларијата на јавниот обвинител утврди дека употребата на сила била оправдана“, напиша таа.
Полицијата сè уште нема објавено никакви официјални снимки од пукањето – ниту од камерите што ги носат полицајците на себе, ниту од безбедносните камери на паркингот. Сепак, на интернет протекоа одредени снимки на кои се гледа како полицајци пукаат кон автомобил што бега од нив.
Адвокатот на семејството Вајли, Бенџамин Крамп, ја оспори одлуката на обвинителството и побара транспарентност.
„Како може некој да прифати таков заклучок кога на семејството на Коен и на јавноста сè уште не им е дозволено да ги видат снимките од полициските камери? Ако снимките ја поткрепуваат одлуката на државата, тогаш објавете ги. Нема да престанеме да се бориме додека ова семејство не ја дознае вистината“, изјави Крамп.
Од друга страна, Мартин Зумах, адвокатот на полицаецот кој употребил огнено оружје, изјави за „Асошиејтед прес“ дека возачот се обидел да го убие неговиот клиент.
„Тој немаше друг избор освен да отвори оган“, рече Зумах.
Трагичниот настан се случи на американскиот празник „Џунтин“ (Juneteenth) – со кој се одбележува крајот на ропството – што предизвика бранови од протести во Сенатобија. Демонстрантите тврдат дека расната припадност имала улога во постапувањето, имајќи предвид дека Коен и двете жени се црнци, додека полицаецот кој пукал и окружниот обвинител се белци. Дополнително, минатиот месец градските власти го отпуштија началникот на полицијата откако беа откриени пораки во кои тој користел расистички навреди.