Пред амбасадата на САД во Прага, чешки активисти денеска изведоа протестен перформанс со истурање црвена боја од буре на улицата, развивање на украинското знаме и скандирање на пароли како „Трамп е предавник“, оставајќи јасна порака: „Американско предавство на нафтата = европска крв“.
Акцијата ја организираше чешката граѓанска иницијатива „Капутин“. Од таму преку соопштение за медиумите потенцираа дека симболичната крв има за цел да предупреди на, како што велат, цинизмот со кој САД ги разменуваат животите и страдањата на Украинците за себични бизнис интереси.
– Симболичната крв што се истури од бурето пред амбасадата на САД предупредува на цинизмот со кој САД ги разменуваат животите и страдањата на Украинците за себичен бизнис – се наведува во соопштението.
По дваесетина минути од почетокот на протестот, чешката полиција интервенираше и ги приведе активистите. Портпаролот на полицијата, Рихард Хрдина, изјави дека тие ќе одговараат за прекршок за осквернување на јавен простор.
– Огорчени сме и згрозени од предавството на американското раководство. Иако Украина доби безбедносни гаранции во Меморандумот од Будимпешта и ги исполни економските очекувања на сегашната администрација на Трамп, Белата куќа ладнокрвно ја предаде – изјави еден од приведените активисти за чешкиот портал Novinky.cz.
Граѓанската иницијатива „Капутин“ функционира во Чешка повеќе од една деценија, потекнувајќи како реакција на руската анексија на Крим. Организацијата е препознатлива по своите улични перформанси за поддршка на Украина и предупредувања за политиките на Кремљ, а претходно стана позната и по поставувањето на импровизираниот споменик „двајца голи диктатори“ на рускиот и белорускиот претседател во центарот на Прага.