Опозицискиот СДСМ преку прес-конференција на портпаролката Богданка Кузеска побара проширување на истрагата за случајот со митото, во кој е умешан возачот на генералниот секретар на Владата, Игор Јанушев.
Кузеска истакна дека возачот бил фатен со обележани евра откако барал мито за да среди вработување во Противпожарната бригада на Град Скопје, сомневајќи се дека зад целата постапка стојат повисоки функционери.
„Возачот на генералниот секретар на Владата, Игор Јанушев, е фатен со обележани евра. Барал мито- поткуп за да ‘среди’ вработување како пожарникар во Противпожарната бригада на Град Скопје. Сега Јанушев сега оградува. Како што се оградува Томовски дека татко му не му е татко. Само оградувања а рацете во медот на сите страни. Оваа организирана криминална група нема граници. Пипалата на овој октопод почнуваат од возачите, преку директорите на претпријатија, министрите, па сè до претседателот на Владата“, изјави Кузеска.
Портпаролката на СДСМ посочи на сомнежите околу улогата на генералниот секретар во случајот.
„Овој скандал отвора едно клучно прашање: каква била улогата на Јанушев во овој случај со мито? Дали возачот е само негова продолжена рака и посредник? Возач нема никаква моќ да вработува. Но генерален секретар на Влада, како Игор Јанушев, кој воедно е член и на Извршниот комитет на ВМРО ОКГ има“, рече таа.
Од СДСМ потсетија и на претходни афери поврзани со кабинетот на генералниот секретар, како и на непријавен имот и бизнис-врски во странство.
„Ова е втор скандал оваа година поврзан со кабинетот на Јанушев. Посебен советник за економски прашања во кабинетот на Генералниот секретар на Владата беше дел од групата осомничени за лихварство и за перење пари. Премногу скандали се врзани со Јанушев. Според документи од Бугарија, Јанушев, е поврзан со компанијата ‘ФЛУГБАН ТРАНС’ ДОО со седиште во Ќустендил, Бугарија. Дејност: патен линиски превоз на стока. Управител Кире Гешоски, трет партнер Сашо Апостоловски – сите од кругот на Мицкоски. Фирмата пријавува годишен промет од околу 320.000 евра. Ама никаде не ја пријавил. Јанушев има бугарски пасош, бугарско државјанство, а во ниту еден анкетен лист до ДКСК не го пријавил бугарскиот капитал“, додаде Кузеска.
Таа ги спомена и прашањата за стекнувањето имот во центарот на Скопје и договорите на „Маратон груп“.
„Понатаму – скандалот со поклонетиот имот вреден 325.000 евра во најстрогиот центар на Скопје. Во истата зграда имот има и министерот за внатрешни работи Панче Тошковски. Како се поврзани подарокот на Јанушев и имотот на Тошковски? Каков заеднички бизнис кријат? Огромен е и скандалот со милионските договори на ‘Маратон груп’ тежок 1,5 милиони евра и мрежата на фирми кои ги објави АКТ на СДСМ. Скандал со скандал. Сите поврзани со Јанушев. На Јанушев ниту портпаролката повеќе не може да му помогне да се испере. Ова е систем. Јанушев е дел од системот на Мицкоски. Ова е Организирана криминална група која ја зароби државата“, истакна Кузеска.
На крајот од прес-конференцијата, од опозициската партија побараа институциите да ги истражат сите наводи.
„СДСМ бара целосна истрага – не само за возачот, туку и за улогата на неговиот шеф, Јанушев. Истрагата мора да се прошири и за фирмата во Бугарија, за поклонетиот имот и за целата мрежа околу Владата на Мицкоски. Граѓаните заслужуваат одговори. Одговорност мора да има“, заклучи портпаролката на СДСМ.