Градоначалникот на Општина Гази Баба, Бобан Стефковски, вечерва го ажурираше своето членство во ВМРО-ДПМНЕ во просториите на Општинскиот комитет на партијата во Гази Баба.
Преку објава на социјалните мрежи, тој истакна дека неговиот политички пат е тесно поврзан со оваа партија уште од периодот на неговото делување во Унијата на млади сили.
„Пораснав со Унијата на млади сили, а продолжив цврсто и достоинствено да чекорам со Општинскиот комитет Гази Баба. Тука стекнав пријатели и соборци. Тука научив што значат лојалноста, истрајноста, заедништвото и борбата за повисоки цели“, напиша Стефковски.
Тој додаде дека партијата за него претставува идеја и кауза обединета околу иднината на земјата.
„ВМРО-ДПМНЕ за мене не е само политичка партија. Тоа е идеја, кауза и големо семејство обединето околу љубовта кон Македонија и нејзината иднина. Нашата сила отсекогаш била во народот, во членството и во секој човек кој искрено верува дека Македонија заслужува напредок, развој и сигурна иднина. Друг пат ние немаме. Македонија е сè што имаме! Затоа мораме да ја чуваме идејата што нè поврзува и да продолжиме да работиме за Македонија каква што ја посакуваме и заслужуваме“, додаде тој.
На крајот од својата објава, Стефковски упати соодветен апел и до останатите сопартијци и поддржувачи.
„Ги повикувам сите членови и поддржувачи на ВМРО-ДПМНЕ да го ажурираат своето членство и со тоа уште еднаш да ја потврдат својата припадност кон нашата заедничка кауза. АЖУРИРАЈ ГО СВОЕТО ЧЛЕНСТВО! ЗА СИЛНО ВМРО-ДПМНЕ, ЗА СИЛНА МАКЕДОНИЈА“, порача Стефковски.