Албанскиот премиер Еди Рама најави итна парична награда од 2.500 евра за секој полициски службеник кој беше ангажиран во справувањето со насилните протести во Тирана. Во исто време, тој предупреди на строги мерки и одговорност за родителите чии малолетни деца учествуваат во инциденти и уништување на имот.
Обраќајќи им се на припадниците на полицијата, Рама нагласи дека државните служби се соочуваат со голем притисок и неправедни напади во јавноста, поради што владата одлучила директно да ги награди за нивната пожртвуваност и храброст на терен.
„За целиот отпор, за целата жртва, за целата храброст и, пред сè, за достоинството со кое се соочувате… веднаш ќе ви ставиме на располагање износ од 2.500 евра за секој полицаец кој е на овој фронт“, истакна премиерот Рама, најавувајќи и значајно зголемување на платите со новиот буџет од 1 јануари.
Во Тирана денеска се одржува седмиот по ред протест, кој започна со студентски бунт на 13 октомври и прерасна во насилни демонстрации. По повод ескалацијата на протестите, Рама упати јасна порака до јавноста и родителите.
„Протестите се право, додека насилството е кривично дело, и оваа црвена линија ќе биде повлечена цврсто во оваа критична фаза од нашиот демократски развој“, порача тој, додавајќи дека родителите ќе сносат целосна одговорност и ќе ја платат штетата доколку нивните малолетни деца учествуваат во акти на насилство и вандализам.