Во смртоносна пукотница што се случила во вторник наутро во холандското место Овераселт убиен е еден 51-годишен обезбедувач, двајца полицајци се повредени, а полицијата досега уапсила најмалку 34 лица, објави „NL Times“.
Инцидентот започнал околу четири часот наутро, по што следела опсежна полициска акција. Меѓу уапсените има државјани на Холандија, Белгија, Франција и Алжир.
„Кога првата полициска единица пристигна на местото на настанот, тие веднаш отворија оган. Тоа беше неверојатно трауматичен инцидент. Мораа да ги спасат своите колеги и да ги однесат на безбедно. Имам најголема почит за она што го направија“, изјави вршителката на должноста шеф на полицијата во Источна Холандија, Јоланда Алберс.
Жртвата е 51-годишен маж од Вихен за кого се претпоставува дека работел како обезбедувач во куќата пред која се случил нападот. Соседите посведочиле дека слушнале најмалку 30 истрели, а полицијата вршела претреси на повеќе локации, вклучително и на автопатишта, железнички станици и во поле со пченка.
Уапсените се сомничат за кривични дела убиство, обид за убиство, заговор и подготовка за киднапирање. Алберс предупреди дека областа сè уште не е целосно безбедна и ги повика жителите да останат во своите домови.
„Во овој момент не знаеме дали сè уште има огнено оружје или дали сè уште има осомничени“, рече Алберс, додавајќи дека полицијата ги пребарува терените за пронаоѓање на оружјето и зачувување на форензичките докази.
Моник Винкештајн од Јавното обвинителство истакна дека првичните индиции укажуваат на „долгорочен конфликт“. Според медиумските извештаи, случајот се поврзува со осудениот бегалец за трговија со дрога, Јос Лајдекерс. Истиот објект бил цел на оружен напад и минатата година.
Градоначалникот на општината Хојмен, Јори Минсес, кој претходно во повеќе наврати наредувал евакуација на куќата, изрази згрозеност од настанот.
„Како градоначалник, со ужас дознав за настаните во Овераселт. Она што се случи синоќа ги преминува сите граници. Целата заедница е шокирана. Ова не е холандско“, рече Минсес.