Над 238 илјади ученици денеска ги враќаат училишните ранци и ги полнат училишните клупи, со што започнува учебната 2026/2027 година. Од нив, околу 174 илјади се во основно, а 64 илјади во средно образование.
Наставата ќе се одвива до 10 јуни 2027 година, додека за матурантите учебната година завршува порано, односно на 17 мај. Зимскиот распуст е предвиден во периодот од 31 декември до 21 јануари.
Конечниот број на новозапишани ученици во прво одделение и прва година средно образование сè уште се утврдува. Според досега доставените податоци до Министерството за образование и наука, запишани се 14.952 првачиња и 16.932 средношколци во прва година.
Од МОН информираат дека учебниците се веќе дистрибуирани до училиштата во количини според нивните потреби. За новата учебна година се обезбедени 622 илјади учебници, а според министерката за образование и наука Весна Јаневска, со набавките се направени заштеди од околу 50 милиони денари во споредба со периодот пред нејзиниот мандат.
Целосно нови учебници во цел тираж има за прво, второ и трето одделение, како и за осмо одделение и вториот клас во гимназиското образование. Причината е воведувањето нови наставни програми во овие одделенија и класови.
Една од главните промени во новата учебна година е проширувањето на едносменската настава. Таа ќе се реализира во 620 од вкупно 1.023 училишни објекти во државата, вклучувајќи ги и централните и подрачните училишта.
Од Министерството велат дека целта е учениците да поминуваат повеќе време во училиште, да имаат подобри услови за совладување на наставниот материјал, поголема концентрација за време на часовите и повеќе можности за социјализација.
Во дел од поголемите градови недостигот на простор претставува пречка за целосна примена на едносменската настава. Поради тоа, се реализираат проекти за доградба на училишни простории. Во моментов се работи на 14 училишта во скопските општини Центар, Карпош, Аеродром, Ѓорче Петров, Бутел и Гази Баба, како и во Илинден и Градско. Дополнително, во следните месеци е планиран почеток на уште 15 вакви проекти.
Паралелно се инвестира и во реконструкција и изградба на училишната инфраструктура. Преку владината програма за капитални проекти во општините се реализираат околу 50 инвестиции, кои опфаќаат изградба и реконструкција на училишта, спортски сали и училишни базени.
Поради оптимизацијата на училишната мрежа, оваа година бројот на паралелки ќе биде намален за 433 – за 222 во основното и за 211 во средното образование. Дел од паралелките со мал број ученици ќе бидат споени и реорганизирани.
Како резултат на тоа што нема запишани ученици, од септември привремено нема да функционираат 26 подрачни училишта. Во земјава во моментов има вкупно 148 празни училишни објекти, најголем дел во руралните средини.
Од МОН нагласуваат дека оптимизацијата нема да значи отпуштања на наставниот кадар кој е редовно вработен. Наставниците кои немаат целосен фонд на часови ќе можат да бидат ангажирани во целодневна настава или дневен престој, а дел од нив, доколку сакаат, и како образовни асистенти.
За учениците со посебни образовни потреби оваа учебна година е обезбеден рекорден број образовни асистенти – 1.358 во основното и 166 во средното образование.
Дополнителна поддршка е предвидена и за учениците кои поради подолго болничко или домашно лекување не можат да присуствуваат на наставата. Тие ќе имаат можност да следат настава онлајн заедно со својот клас или да работат индивидуално со наставник.
МОН најавува продолжување на поддршката за талентираните ученици. Министерството ќе ги покрива трошоците за патување и учество на меѓународни научни олимпијади.
За родителите, до 30 септември останува да важи мерката за 15 отсто пониски цени на училишниот прибор. Во октомври, пак, се очекува да бидат објавени конкурсите за ученички стипендии.
Според договорот постигнат меѓу Министерството за образование и наука и СОНК, од март 2027 година наставниците треба да добијат ново зголемување на платите. Зголемувањето ќе се движи меѓу 7,5 и 10 проценти, зависно од стапката на инфлација.