Владата донесе одлука за намалување на цените на училишниот прибор, која ќе важи до 30 септември годинава, со цел да се олесни семејниот буџет пред почетокот на новата учебна година.
На денешната прес-конференција, пратеникот од редовите на ВМРО-ДПМНЕ, Бојан Стојаноски, информираше дека со оваа мерка трговците на големо се задолжуваат да ги намалат цените на училишниот прибор за најмалку 10 проценти, додека трговците на мало ќе мора да обезбедат намалување од најмалку 15 проценти.
„Ова е конкретна и директна поддршка за семејствата во период кога родителите имаат зголемени трошоци за подготовка на своите деца за новата учебна година. За семејствата со повеќе од еден ученик ова ќе значителна помош и заштеда на семејните буџети“, изјави Стојаноски.
Според соопштеното, мерката опфаќа ранци, ташни, тетратки, блокови, колажи, моливи, пенкала, боици, пластелини, фломастери, линијари и дидактички материјали.
Трета година по ред се воведува „училишна кошничка“
Пратеникот посочи дека ова е трета година по ред како се воведува оваа мерка за намалување на трошоците во септември.
„Целта на Владата предводена од ВМРО-ДПМНЕ е јасна. Родителите да можат да го обезбедат потребниот училишен прибор за своите деца по пониски и попристапни цени. Ова е трета година по ред каде што пред почетокот на учебната година Владата воведува училишна кошничка со единствена цел да им го олесни месец септември на родителите и семејствата, да ги заштеди семејните буџети и да го заштити животниот стандард на граѓаните“, нагласи тој.
Стојаноски додаде дека почетокот на учебната година треба да биде период без дополнителен стрес за семејствата.
„Септември и почетокот на учебната година треба да биде момент на среќа и убаво расположение како на учениците што се враќаат во училишните клупи, така и за родителите кои треба да ги подготват своите деца со сите потребни материјали за на училиште, а не моменти на грижа и на стрес како да се намерат трошоците. Токму затоа Владата продолжува со политики кои носат конкретна корист за граѓаните и директно придонесуваат за заштита на животниот стандард“, заклучи тој.