Тврдењата на СДСМ дека водата во Скопје е небезбедна за пиење претставуваат опасна дезинформација и ширење паника меѓу граѓаните, обвини денеска пратеникот на ВМРО-ДПМНЕ, Бране Петрушевски.
На прес-конференцијата тој истакна дека надлежните институции веднаш реагирале и ги демантирале изнесените информации.
Таман човек ќе помисли дека СДС го допреле дното, тие повторно покажуваат само едно, дека се бунар без дно. Овој пат отидоа до таму со своите лаги и ширење паника меѓу граѓаните велејќи дека водата во Скопје е небезбедна за пиење – изјави Петрушевски.
Тој додаде дека ваквите дезинформации се пласираат за евтини политички поени, иако можат директно да влијаат врз здравјето на граѓаните.
СДС и нивниот моментален претседател Венко Филипче кој со својот ментор и партиски другар Зоран Заев се шета по Егејот треба да се смири и да не се однесува како сонцето да му удрило во глава и да дава вакви насоки за вакво ширење паника – порача пратеникот.
Според ВМРО-ДПМНЕ, ваквиот обид за дезинформирање покажува дека опозициската партија нема што да им понуди на граѓаните.
Надлежните државни институции веднаш реагираа демантирајќи ги со факти, а реагираше и обвинителството. Сепак се очекува исход од истрагата бидејќи вакви дезинформации се опасни. Се очекува деновиве добра вест и од Гостивар дека водата е квалитетна за пиење – нагласи тој.
Петрушевски заклучи дека опозициската СДСМ со своите постапки почнува да дејствува опасно за граѓаните.
За жал, во оваа држава СДС како опозициска партија почнува да делува и опасно за граѓаните. СДС и актуелното раководство со своите вакви постапки покажува само дека е талогот на Македонија – изјави Петрушевски.