Во Свечената сала на Владата денеска ќе се одржи свечена седница по повод 25-годишнината од потпишувањето на Охридскиот рамковен договор.
На настанот ќе се обратат првиот вицепремиер и министер за европски прашања Беким Сали и вицепремиерот и министер за транспорт Александар Николоски. Седницата ќе се пренесува во живо преку официјалните профили на Владата на „Фејсбук“ и „Јутјуб“.
Охридскиот рамковен договор беше потпишан на 13 август 2001 година во Скопје, по завршувањето на преговорите што се водеа во Охрид, со што беше означен крајот на вооружениот конфликт во земјата.
Договорот во претседателската резиденција на Водно го потпишаа тогашниот претседател Борис Трајковски, тогашниот премиер и лидер на ВМРО-ДПМНЕ Љубчо Георгиевски, лидерот на СДСМ Бранко Црвенковски, лидерот на ПДП Имер Имери и лидерот на ДПА Арбен Џафери. Потписи ставија и специјалните претставници на ЕУ и САД, Франсоа Леотар и Џејмс Пердју.
Во годините по неговото потпишување, за спроведување на договорот се донесени повеќе од 130 закони, измени и дополнувања. Од нив, 59 се однесуваат на правичната застапеност, додека 40 опфаќаат области поврзани со идентитетот, културата, образованието и децентрализацијата на власта.
За следење и спроведување на договорот првично беше формиран Секретаријат за спроведување на Охридскиот рамковен договор, кој во 2019 година беше трансформиран во Министерство за политички систем и односи меѓу заедниците.