Два комерцијални брода биле погодени со беспилотни летала во бугарската ексклузивна економска зона во Црното Море, соопшти бугарскиот премиер Румен Радев, оценувајќи го нападот како кршење на меѓународното и поморското право.
Според Радев, нападите се случиле околу три часот по полноќ, на околу 128 километри од бугарскиот брег.
Бродот „Алфа Ватан“, кој пловел под знаме на Того, претрпел сериозни оштетувања и потонал. Засега нема целосни информации за судбината на неговиот екипаж.
Вториот брод, „Абл“, под знаме на Палау, се запалил по нападот. Бугарски ферибот ги евакуирал сите 18 членови на екипажот, а двајца морнари со тешки повреди биле пренесени во болница во Варна.
Потеклото на беспилотните летала засега не е утврдено.
Според достапните информации, „Абл“ превезувал пченица и пловел кон југ, додека „Алфа Ватан“ се движел кон север. Бугарските власти ја следат состојбата и поради можни излевања на нафта и загадување на животната средина.
Радев предупреди дека ваквите инциденти сериозно го нарушуваат превозот во Црното Море, ги зголемуваат трошоците за осигурување и дополнително ја влошуваат безбедносната состојба во регионот.
Нападите следуваат еден ден откако товарен брод во турска сопственост, кој превезувал пченица, бил погоден со дрон и подоцна потонал во Црното Море. Во тој напад загинале две лица.