Во „Европската куќа“ во Скопје денеска ќе биде презентиран новиот Кодекс на новинари, документ кој треба да придонесе кон унапредување на професионалните и етичките стандарди во медиумската сфера.
Од Здружението на новинарите на Македонија (ЗНМ) и Македонскиот институт за медиуми (МИМ) информираат дека измените на Кодексот се дел од проектот „Јакнење на етичките стандарди за поголема доверба во медиумите“, поддржан од Владата на Швајцарија преку Цивика мобилитас.
Новиот документ е резултат на повеќефазен процес во кој биле вклучени новинари, уредници и медиумски професионалци од различни делови на земјата. Измените опфаќаат освежување на постојните правила, но и воведување нови стандарди кои треба да одговорат на предизвиците што ги носи дигиталното новинарство и современите начини на информирање.
Од ЗНМ и МИМ посочуваат дека преку консултативни средби и работилници биле собрани искуства и предлози од новинарската заедница, кои биле земени предвид при изработката на финалната верзија на документот.
Настанот е најавено да започне во 11 часот.