Комисијата за имунизација донесе одлука за времено одложување на вакцинацијата со БСЖ, по информациите од Хрватска за појава на несакани реакции од вакцината против туберкулоза.
Од Министерството за здравство информираат дека Македонија користи вакцина од истиот производител како Хрватска, поради што веднаш била контактирана Агенцијата за лекови и медицински средства – МАЛМЕД и биле побарани податоци за сериите вакцини што се користат во земјава.
Вакцинацијата ќе остане времено запрена додека не се добијат целосни информации за сериите, нивниот квалитет и евентуалната поврзаност со пријавените несакани реакции.
Од Комисијата потсетуваат дека БСЖ вакцинацијата во Македонија е задолжителна, бидејќи земјата се смета за подрачје со висок ризик од туберкулоза.
Во моментов на Институтот за ТБЦ има 95 пациенти со туберкулоза, од кои 83 се регистрирани годинава. Во Детската болница Козле во 2025 година биле евидентирани 15 случаи, а годинава 12 нови случаи.
Во изминатите десет години до МАЛМЕД била пријавена само една сомнителна несакана реакција од БСЖ вакцина, во август 2022 година, кога кај пациент се појавил апцес на местото на апликација на вакцината.