Србија од март следната година повторно го воведува задолжителниот воен рок, потврди српскиот претседател Александар Вучиќ, пренесува медиумот „Н1“.
Оваа најава Вучиќ ја даде за време на неговата обиколка на воената опрема на аеродромот „Миленко Павловиќ“ во Батајница, во близина на Белград.
„Пред тоа ќе се спроведат соодветните бирократски процедури, а во март започнуваме со служење на многу краткиот воен рок. Тоа дополнително ќе ги зајакне нашите одбранбени капацитети“, истакна Вучиќ.
Што предвидува новиот закон?
Претходно, актуелната власт во соседна Србија најави дека воениот рок ќе трае 75 дена и ќе биде задолжителен за мажи на возраст до 30 години.
Враќање на стариот систем по повеќе од една деценија
Со оваа одлука, Србија го менува моделот кој беше во сила цели 15 години. Имено, Армијата на Србија официјално стана професионална војска на 1 јануари 2011 година, по одлука на тогашните власти со која се укина обврската за служење воен рок.
Од тогаш, редовната воена обврска беше заменета со доброволно служење, а војската се пополнуваше исклучиво со професионални војници и офицери.