Основното јавно обвинителство Скопје отвори истражна постапка против 33-годишен маж поради сомнение за неовластено изработување, држење, посредување и тргување со оружје и експлозивни материи, како и за неовластено производство и пуштање во промет на наркотични дроги.
При претресот во неговиот дом, полициските службеници пронашле поголемо количество забрането оружје и муниција. Меѓу запленетите предмети се издвојува една рачна бомба „М75“ со метални кугли и шрапнелско дејство, пиштол „Црвена Застава“ со калибар 7,65 милиметри со рамка од седум куршуми, пиштол „Берета“ со шест куршуми во рамката, како и вкупно 240 куршуми со различен калибар. Покрај оружјето, во станот биле пронајдени и околу 7 грама марихуана.
Посебно внимание во истрагата привлекол клуч од мотор пронајден на лице место. Според информациите од ОЈО Скопје, за овој мотор постојат оперативни сознанија дека бил искористен при извршување на кривично дело убиство.
„Во станот бил пронајден и клуч од мотор за кој постојат оперативни сознанија дека бил искористен при извршување на кривично дело убиство“, наведуваат од Обвинителството.
Поради опасност од бегство и можност за повторување на кривичните дела, јавниот обвинител до надлежен суд достави предлог за определување мерка притвор со цел да се обезбеди непречено водење на постапката. Истрагата продолжува, а за осомничениот важи презумпцијата на невиност до евентуална правосилна судска одлука.