Градоначалникот на општина Гази Баба, Бобан Стефковски, информираше за почетокот на градежните активности за изградба на нови пешачки патеки со павер елементи во населбата Ченто.
Според неговите зборови, со овој проект се реализира уште едно конкретно ветување дадено пред граѓаните за подобрување на локалната инфраструктура.
„Денес започнуваме со реализација на уште едно ветување кое им го дадов на граѓаните на Ченто – изградба на нови пешачки патеки со павер елементи. За време на изборната кампања ветив дека граѓаните повеќе нема да газат во кал. Денес тоа ветување станува реалност“, истакна Стефковски.
Како што додава тоа, со оваа инвестиција се создаваат уредени, безбедни и современи пешачки површини, достојни за секој жител на Ченто.
„За нас зборот има тежина, а делата се најсилната потврда дека работиме чесно, посветено и одговорно. Активностите нема да застанат тука. Ќе продолжиме и во другите населени места со изградба на нови пешачки патеки, затоа што секој граѓанин заслужува уредена, безбедна и достојна средина за живеење“, потенцира градоначалникот на Гази Баба.
Тој најави дека општината ќе продолжи да инвестира во секоја населба со цел да се решаваат долгогодишните проблеми и чекор по чекор да се подобрува секојдневието на граѓаните.
„Ветивме дека нема повеќе кал – денес градиме патеки. Ветивме промени – денес тие се гледаат на терен“, заклучува Стефковски.