Министерот за внатрешни работи Панче Тошковски оценува дека интерпелацијата поднесена од пратеничката група на Левица претставува, како што наведува, политички обид без суштински аргументи, чија цел е да се закочи процесот на справување со криминалот и корупцијата.
Тошковски реагираше преку објава на социјалните мрежи, посочувајќи дека ова е трета интерпелација против него во период од две години и дека, според него, истата повторно е најавена преку политички настап, а не преку конкретни аргументи.
Тој нагласува дека интерпелацијата е демократско право на опозицијата и дека нема намера да избегнува собраниска расправа, туку напротив ќе ги соочи ставовите во парламентот пред пратениците и јавноста.
Во својата реакција, министерот упати и критики кон Левица, тврдејќи дека партијата со ваквите потези, како што вели, се позиционира како политички сојузник на СДСМ и ДУИ, иако претходно се претставувала како нивна алтернатива.
Тошковски оценува и дека партијата, според него, сè повеќе прибегнува кон политичка конфронтација и создавање вештачки кризи, наместо да нуди конкретни резултати и решенија.
„Не се напаѓа оној што е неважен, се напаѓа оној што менува нешто“, наведува министерот, додавајќи дека ќе продолжи да работи и дека конечниот суд ќе го дадат граѓаните.