Владата ја усвои информацијата за формирање на посебен Центар за итна медицинска помош Скопје, по предлог на Министерството за здравство.
Оваа одлука има за цел да воспостави поефикасен и поодржлив систем за итен медицински одговор, да го скрати времето на интервенција на терен и да ги унапреди вкупните капацитети за спасување на човечки животи.
Ресорниот министер образложи дека овој чекор претставува сериозна структурна промена која ќе донесе поголема оперативна независност на самата служба.
„Одвојувањето на Итната медицинска помош претставува значајна системска реформа насочена кон зајакнување на организациската и оперативната самостојност на службата. Со формирањето самостоен Центар за итна медицинска помош ќе се овозможи поефикасно управување со ресурсите, посебно буџетско планирање, побрзо донесување одлуки и подобрување на одговорот на итните повици. Предложената реформа не претставува создавање нов систем, туку институционално зајакнување и модернизација на постојната организација за подобро планирање на ресурсите, инвестициите и кадровскиот развој“, појаснува министерот за здравство, Азир Алиу.
Според планот на Министерството за здравство, процесот ќе се реализира етапно, при што главниот град е земен како почетна точка на реформата.
Во првата фаза е предвидено издвојување на ИМП Скопје како самостојна институција, по што постепено ќе следи интегрирање на останатите служби во рамки на идниот Центар за итна медицинска помош.
Надлежните посочуваат дека целата реформа се темели на веќе проверени и позитивни искуства од земјите во регионот каде што оваа служба функционира како посебна институционална структура.
Ваквата организација треба да овозможи подобра координација на медицинските тимови, поефикасно користење на ресурсите и воспоставување на единствени стандарди за работа и професионален развој.
Формирањето на Центарот ќе придонесе за надминување и на долгогодишните кадровски и организациски предизвици, обезбедувајќи поефикасен систем на итна медицинска помош за граѓаните, наведуваат на крајот од Министерството.