Три малолетни деца кои вчера беа пронајдени во бессознание на кумановската улица „Професор Мијалковиќ“, веднаш биле пренесени во Општата болница Куманово, каде што биле прегледани од педијатар и од интернист. Во болницата ги донела екипа на Итната медицинска помош во придружба на полициски службеник.
Од болницата информираат дека при приемот децата биле стабилни, но во запуштена состојба, свесни, со проширени зеници и промени во однесувањето. И покрај сериозноста на ситуацијата, семејството одбило соодветна медицинска нега.
„Децата беа прегледани од педијатар и интернист согласно возраста, а беше повикан и социјален работник. Во присуство на социјален работник и инспектори од МВР, родителите изричито одбија понатамошна опсервација и лабораториски испитувања, и покрај инсистирањето да останат за дополнителни иследувања“ – информираат од болницата.
Од здравствената установа додаваат дека родителите си ги презеле децата, иако лекарите писмено ги упатиле за итни испитувања на Клиниката за детски болести, на Токсикологија за токсиколошки анализи, како и на детска психијатрија.
Во случајот веднаш се вклучи и Центарот за социјални работи Куманово, кој бил известен телефонски од социјалниот работник во болницата и веднаш воспоставил контакт со СВР Куманово.
„Од наша страна веднаш беше контактиран инспектор од СВР Куманово кој разговарал со децата и родителите. Децата биле свесни и според нивното кажување спиеле кога биле затекнати од непознато лице“ – информираат од Центарот.
Од институцијата потврдуваат дека иако лекарите дале упати за дополнителни и подлабоки анализи, родителите сметале дека нема никаква потреба од нивно спроведување. Ова семејство и претходно било дел од нивните досиеја.
„Семејството е евидентирано во Центарот и претходно е постапувано по однос на деца на улица. За конкретниот настан родителите и децата веднаш се повикани во Центарот и ќе постапиме согласно нашите надлежности“ – информираат од Центарот за социјални работи.
Како што дознаваме, децата и претходно биле евидентирани во Центарот за социјални работи заедно со нивната мајка при просење низ кумановските улици.
Претходно, од СВР Куманово информираа дека трите малолетни деца — петнаесетгодишно девојче и нејзините двајца браќа на возраст од дванаесет и девет години, биле пронајдени вчера околу 10:40 часот без реакција на допир. Според првичните информации од пријавата, децата најверојатно биле затруени од вдишување лепило.