Европа се соочува со еден од најраните и најинтензивните топлински бранови во последните неколку децении, а метеоролозите предупредуваат дека крајот на мај носи температури карактеристични за средината на јули. Причина за ова е силна „топлинска купола“ над западните и централните делови на континентот, која го задржува врелиот воздух и ги крева температурите и до 16 степени над просекот.
Феноменот познат како топлинска купола функционира слично како капак на тенџере. Високиот воздушен притисок спречува мешање на атмосферата и го „заклучува“ топлиот воздух блиску до тлото. Силното сончево зрачење и компресијата на воздухот дополнително ја загреваат површината, што резултира со екстремни горештини кои можат да траат со денови, па дури и со недели.
Изминатиов викенд веќе донесе рекордни вредности во неколку европски региони:
- Лондон: Измерени се 32,3 степени Целзиусови, што е најтоплиот мајски ден во последните 80 години.
- Пиринејски Полуостров: Во Португалија и Шпанија температурите се искачија помеѓу 35 и 38 степени.
- Италија и Балканот: Регистрирани се вредности помеѓу 31 и 34 степени Целзиусови.
Според метеоролошките прогнози, најсилниот удар допрва следува во Шпанија, Франција, Германија и Велика Британија, каде живата во термометарот за првпат годинава би можела да достигне 40 степени.
Екстремно жежок период се очекува и во Централна Европа и на Балканот. Кон средината на неделата, температурите на северен и централен Балкан ќе ја надминат границата од 35 степени, со голема веројатност за рушење на локалните рекорди.
Овие долготрајни топлински бранови претставуваат сериозен ризик за здравјето, особено за повозрасните лица, децата, хронично болните и работниците на отворено. Експертите предупредуваат и на „топлинскиот индекс“, кој ја комбинира температурата со влажноста на воздухот, создавајќи субјективно чувство на топлина кое е значително повисоко од реално измерените вредности.