Странските државјани кои планираат да аплицираат за американска „Зелена карта“, во иднина ќе мора да ја започнат целата процедура надвор од територијата на САД, пренесува агенцијата ДПА.
Ова е одлука на Службата за државјанство и имиграција на САД (УСЦИС), согласно новите правила на администрацијата на претседателот Доналд Трамп.
Според новото правило, секој странски државјанин кој привремено престојува во САД ќе мора да се врати во својата матична земја за да поднесе барање, освен во вонредни и исклучителни околности.
Досегашната американска пракса им овозможуваше на туристите, студентите и други привремени посетители, под одредени услови да аплицираат за постојан престој додека се наоѓаат во земјата.
Медиумите во САД пренесуваат дека повеќе од половина од одобрените „Зелени карти“ на годишно ниво досега се издавале токму преку оваа процедура која сега се укинува.
Имиграциската служба појаснува дека системот е дизајниран за привремените посетители да ја напуштат земјата по завршувањето на престојот, наместо тоа да го користат како прв чекор за постојан престој.
Со оваа промена надлежните очекуваат да се ослободат ресурси кои ќе се насочат кон обработка на визи за жртви на криминал, трговија со луѓе и барања за натурализација.