Градоначалникот на Кисела Вода, Орце Ѓорѓиевски, информираше за одржувањето на конструктивна кафе-дебата под наслов „ЕПК 2028 – Културното наследство и современата културна динамика“.
На средбата учествуваа експерти од областа на културата, универзитетски професори и културни работници кои понудија нови идеи за развојот на главниот град.
„Денес, на моја огромна чест, одржавме конструктивна и многу плодна дебата со експерти од областа на културата, универзитетски работници и културни работници од кои произлегоа многи идеи. Скопје 2028, титула која ја доби нашиот главен град е пресвртна точка во начинот на кој го замислуваме, чувствуваме и развиваме Скопје.“
Ѓорѓиевски потенцираше дека културната иднина на градот мора да се гради низ отворен и инклузивен дијалог со сите чинители.
„Затоа овој процес е отворен, инклузивен и заснован на дијалог. Културната иднина на градот не може да се создава зад затворени врати. Мора да ја градиме заедно со институциите, независната културна сцена, академската заедница, уметниците, младите и граѓаните.“
Во фокусот на разговорите било и културното наследство, кое според него треба да се поврзе со современите дигитални и урбани трендови.
„Посебно важно е културното наследство да го гледаме како жив ресурс. Наследството не е само она што го чуваме, туку и она што го разбираме, го оживуваме и го пренесуваме во иднината. Скопје има богати историски, архитектонски, духовни и културни слоеви, кои треба да ги поврземе со современата уметност, јавниот простор, дигиталната култура, образованието, туризмот и новата урбана енергија.“
Проектот се очекува да донесе нова енергија и ревитализација на јавните простори и независните културни центри.
„Културната ревитализација е нов живот во институциите, маалата, парковите, музеите, јавните простори и независните културни центри. Кога инвестираме во култура, инвестираме во луѓето, во градот и во неговата иднина.“
На крајот, тој подвлече дека вистинскиот резултат од оваа престижна титула ќе се рефлектира преку трајните вредности кои ќе останат понатаму за граѓаните.
„Затоа, успехот на Скопје 2028 нема да се мери само според тоа што ќе се случи во 2028 година, туку според тоа што ќе остане по неа – посилни институции, подобра културна инфраструктура, активни јавни простори, нови партнерства и поголема доверба меѓу градот и граѓаните. Скопје 2028 е наша заедничка шанса. И наша заедничка одговорност.“