Еврокомесарката за проширување, Марта Кос, денеска пред почетокот на состанокот на Советот за надворешни работи на ЕУ во Брисел, испрати силна порака до регионот. Таа потврди дека Унијата останува отворена за сите аспиранти од соседството, нагласувајќи ја потребата од континуитет во реформските процеси.
„Во ЕУ има место за сите држави од Западен Балкан. Очекувам сите овие земји цврсто да останат на патот кон ЕУ,“ истакна Кос во својата изјава.
Покрај стандардните интегративни процеси, еврокомесарката откри дека во Брисел се дискутираат и нови модели на инклузија кои би овозможиле побрзо приближување на земјите кандидати до европските стандарди и структури. Според неа, фокусот не е само на економијата, туку и на безбедноста.
Таа појасни дека во моментов се разгледува можноста за постепено пристапување, што би опфатило не само вклучување во единствениот пазар на Унијата, туку и засилена соработка во областа на одбраната.