,Денес, после 81 година, се потсетуваме на денот кога црвеното знаме на слободата се развеа над урнатините на тиранијата, означувајќи го триумфот на работништвото, прогресивните и слободарски сили и обединетите народи против смртта, робството, експлоатацијата и омразата. Ова не е само датум од историјата, туку симбол на победата на човекот над варварството и мракот, велат од СПМ.
Со посебен пиетет, гордост и восхит се поклонуваме пред делото на нашите партизани и борци од Народноослободителната војска на Македонија. Тие не само што го победија бугарскиот фашистички окупатор, туку ја поведоа и социјалистичката револуција која го разбуди поробениот македонски народ.
Како што пееше големиот Кочо Рацин, повикувајќи го работниот народ да ја пресретне бурата и да ја изора земјата за ’радост и песна‘, така и нашите борци во НОБ со пушка и идеали ја донесоа пролетта на слободата.
Преку крвта пролеана на боиштата од НОБ, македонскиот работник и селанец, организирани во Народниот Фронт, извојуваа право да бидат господари на својата судбина и да ја изградат својата слободна република. Нивниот труд и жртва денес се темелот на нашата социјална и национална слобода.
На темелите на АСНОМ-ска Македонија, низ социјалистичката изградба, научивме дека слободата е вистинска само кога е придружена со социјална правда, еднаквост и взаемно почитување меѓу народите.
Антифашизмот не е само минато, туку постојана борба против секоја форма на угнетување, национализам и неправда во денешното општество.
Денес, кога се соочуваме со нови предизвици, нека ни биде пример непокорот на нашите револуционери. Да ги чуваме придобивките од борбата на македонските партизани од 33-те бригади, 8-те дивизии и 3-те корпуси и да не дозволиме да избледе споменот на оние кои паднаа за да изградат свет на еднакви.
Во мигови кога тишината е најгласна и кога сеќавањата навираат, восхитени од нивната невидена пожртвуваност и смелост, длабоко се поклонуваме пред македонските паднати борци.
Слава им!
Смрт на фашизмот-слобода на народот!
Честит 9 Мај!, стои во честитката на СПМ.