Тешка сообраќајна несреќа се случи на еден од најфреквентните булевари во главниот град. Автобус кој сообраќал на градската линија број 12 прегази 81-годишна жена на булеварот „Партизански одреди“ во Скопје, нанесувајќи ѝ тешки телесни повреди.
Според официјалните информации од Министерството за внатрешни работи, инцидентот бил пријавен во СВР Скопје на 28 април во 18:10 часот.
„Автобус марка ‘мерцедес’ со скопски регистарски ознаки, сопственост на приватен превозник, управуван од 61-годишниот Б.А. од скопското село Грчец, удрил во 81-годишната Р.С. од Скопје“, стои во полицискиот билтен.
Повредената жена веднаш била пренесена во Градската општа болница „8 Септември“ во Скопје, каде што од страна на медицинскиот персонал ѝ биле констатирани тешки телесни повреди и ѝ била укажана неопходната лекарска помош.
На местото на настанот веднаш излегла увидна екипа на СВР Скопје која извршила детален увид за да се утврдат точните причини и околности под кои дошло до оваа тешка сообраќајна несреќа.