Министерството за внатрешни работи ги известува граѓаните на Скопје дека денеска ќе биде воведен посебен режим на сообраќај на повеќе локации низ градот, поради одржување на две спортски манифестации.
Првиот настан е планинската трка „Водно-Матка Треилс 2026“, која започнува во 07:00 часот наутро. Стартно-целната позиција е во комплексот „Македонско село“, а трасата се движи по дел од јавниот пат до селото Горно Нерези (кај џамијата), по што натпреварувачите продолжуваат по планинските патеки. Поради оваа трка, сообраќајот на овој потег ќе биде привремено затворан во три кратки интервали од по пет минути: од 07:00 до 07:05 часот, од 08:00 до 08:05 часот и од 09:00 до 09:05 часот.
Вториот настан е улична трка во организација на Сојузот на спортови на Скопје, која започнува во 10:00 часот. Трката ќе се одвива по булеварот „Илинден“, со старт кај фонтаната „Лотус“. Учесниците ќе трчаат по булеварот до крстосницата со булеварот „8 Септември“, каде ќе прават полукружно свртување и ќе се враќаат назад кон стартната позиција.
Единицата за безбедност на патниот сообраќај при СВР Скопје ќе биде на терен и ќе ги пренасочува возилата по околните сообраќајници. Од МВР апелираат до сите учесници во сообраќајот да ги почитуваат наредбите на полициските службеници со цел безбедно и непречено одвивање на настаните.