Високата претставничка на ЕУ за надворешна политика, Каја Калас, предложи нов модел за деблокада на Ормутскиот теснец, инспириран од иницијативата за извоз на украинско жито преку Црното Море. Пред состанокот на министрите за надворешни работи на ЕУ, Калас откри дека веќе разговарала со генералниот секретар на ОН, Антонио Гутереш.
„Разговарав со Антонио Гутереш за тоа дали е можно да се има иста иницијатива како што имавме во Црното Море, бидејќи затворањето на Ормутскиот теснец е исклучително опасно за снабдувањето со нафта и енергија во Азија“, изјави Калас.
Таа предупреди дека блокадата не влијае само на енергенсите, туку и на пазарот на храна поради извозот на ѓубрива. Калас потенцираше дека доколку не се обезбеди транзит на ѓубрива годинава, следната година светот ќе се соочи со сериозен недостиг на храна.