Израелскиот премиер Бенјамин Нетанјаху ја одржа својата прва прес-конференција од почетокот на воениот конфликт, порачувајќи дека по две недели интензивно бомбардирање, моќта на Иран е значително ослабена. Тој истакна дека израелските сили задале тешки удари врз елитниот Корпус на Револуционерната гарда и паравоените сили Басиџ.
Нетанјаху вети дека операциите против Хезболах ќе продолжат со несмален интензитет, како одговор на нападите започнати на 2 март по атентатот врз врховниот лидер Али Хамнеи.
Премиерот на Израел беше дециден дека крајната цел на нападите е целосно уништување на иранските нуклеарни и балистички капацитети.
„Целта на нападот врз Иран е да се елиминира она што го сметаме за егзистенцијална закана, претставена преку нуклеарните и балистичките ракетни програми на Техеран“, изјави Нетанјаху.
Иако не може со сигурност да предвиди дали иранскиот народ ќе ја собори власта, Нетанјаху нагласи дека Израел активно работи на слабеење на позициите на Техеран.
„Создаваме оптимални услови за соборување на режимот, но нема да негирам дека не можам да ви кажам со сигурност дека иранскиот народ ќе го собори режимот. Режимот е соборен одвнатре. Но, ние дефинитивно можеме да помогнеме и помагаме“, заклучи тој.