Министерот за внатрешни работи, Панче Тошковски, на денешната прес-конференција соопшти детали за трагедијата на улицата „Теодосиј Гологанов“, каде по пад од балкон животот го загубија жена и малолетно дете.
Трагедијата имала драматична претходница истиот ден. Во 12:05 часот полицијата интервенирала по пријава за расправија меѓу сопружниците.
„Беше извршен разговор со сопругата, која изјави дека немало физички контакт, дека станува збор за недоразбирање и дека не бара постапка ниту интервенција. Таа наведе дека брачните односи ги решава преку бракоразводна постапка и потпиша службена белешка“, истакна Тошковски.
По оваа интервенција, жената заминала во станот каде подоцна се случи фаталниот пад. Од местото на настанот се подигнати материјални траги и мобилен телефон кои се дадени на вештачење.